دورة التبريد

دورة التبريد


2017-01-11


دورة التبريد

أول حاجة نعرفها ايه مكونات دورة التبريد ؟؟؟

1- الرادياتير

2- طلمبة المياه

3- المروحة

4- الثرموستات

5- خراطيم التوصيل (كوعة المياه)


تعالوا نشوف حاجاة حاجة ونفهمها صح الصح 

اول حاجة 

1- الرادياتير Radiator 

ترجمتها بالعربى يعنى المشع الحرارى 

برضوا يعنى ايه يا عم انت 

 هو عبارة عن مبادل حرارى فايدته انه بيقوم بتبريد المياه السحنة عن طريق الهواء وهو عادة بيبقى مصنوع من النحاس او الالومنيوم 

طب اشمعنا النحاس او الالومنيوم ؟؟

 علشان التوصيلية الحرارية عالية للمادتين دول علشان بيسخن بسرعة ويبرد بسرعة 

 وعلشان كده حضرتك بردا الشاى بيبقى مصنوع من النحاس او الالومنيوم علشان نفس الفكرة


طب ليه بيكون بالشكل الغريب ده ؟؟؟

 هو اصلا شكله بكل بساطة عبارة عن خزنتين واحدة من فوق وواحدة من تحت دول اللى بيبقى راكب فيهم جلود المياه والخزنتين دول بينهم شوية مواصير صغيرين خالص 


طب ليه بيبقى فيه زى ريش صغيرة وكتيرة او بيبقى شكله كله شرايح ؟؟


دى يا سيدى اسمها fins وفايدتها انها بتزود التبريد بتاع الرادياتير لانها بتزود مساحة اللى متعرضة للهواء وبالتالى بتزود انتقال الحرارة يعنى بتزود التبريد 


وطبعا الرادياتير ده بيحتاج يتنضف او يتغير كل فترة ع حسب نوع العربية وطبيعة شغلها لانه اوقات بيسبب سخونه للعربية 

 وكمان يا ريت واحنا بنغسل العربية ف المغسلة نخلى الراجل بضغط الهواء ينفخ الشبكة بتاع الرادياتير علشان ينضف ويبرد كويس 


تانى حاجة

2- طلمبة المياه 

 طلمبة زيها زى اى طلمبة ودى بتتكون من مكان للسحب ومكان للطرد وعدة اجزاء رثيسية زى (casing, bearings , impeller , shaft, cell)

 ايه وظيفتها انها بتقول بتقليب المياه داخل البلوك يعنى بتعمل عملية تدوير للمياه بحيث انها تدخل المياه الباردة جواء البلوك حول الشمايز وتطلع المياه السخنة للرادياتير علشان تبرد 

دى وظيفتها بكل بساطة

بتشتغل ازاى او ايه اللى بيحركها ؟؟

ف 3 طرق لتحريك الطلمبة دى ف جميع انواع المحركات 

اما عن طريق ترس او سير او الكاتينة 

ايه اعطالها ؟؟

 ممكن تعمل صوت زى حاجة بتشخلل كده وده لما يبوظ البلى بتاعها ودى سهل نعرفها بنفسنا لما تكون شغالة ع سير ممكن نفصل السير ونشغل العربية لمدة ثوانى لو الصوت راح تبقى هى البايظة وف الحالة دى نغيرها او نصلحها لو كان الصوت مستمر بعد ما فصلنا السير يبقى الطلمبة سليمة 


ممكن كمان يحصل تسريب للمياه منها لو ال cell باظت 

ممكن كمان تسخن العربية لو ال impeller بتاعها اتاكل 

وطبعا ف كل الحالات دى لازم نغيرها 


تالت حاجة 

3- المروحة 

 ودى وضيفتها انها بتساعد ع تبريد الرادياتير عن طريق شفط الهواء علشان يزيد ع الرادياتير 

 ودى بتشتغل وتفصل تلقائى لان ف حساس خاص بيها ويشغلها ويفصلها ع حسب الحاجة 


رابع حاجة 

4- الثرموستات 

ودى بتبقى راكبة ف الكوعة 

ووظيفتها 

انها بتساعد ع ثبوت درجة حرارة المحرك عن طريقة انها بتعمل  By pass ع طلمبة المياه اول ما تشغل العربية 

 يعنى هى بتبقى قافلة والعربية باردة واول ما تشغلها تفضل قافلة لغاية ما العربية تسخن وبعدين تفتح ع حسب درجة الحرارة 

ودى لما بتبوظ بتعمل حاجتين اما بتسخن العربية لما بتقفل ومش تفتح 

او بتخلى العربية تسخن الصبح متاخر لما بتكون فاتحة علطول ومش بتقفل


واخيرا 

5- خرطايم التوصيل ودى كلنا عارفينها 

وطبعا عندنا حساس علشان يقيس درجة الحرارة ده اهم حاجة 


وخلصنا دورة التبريد 


شوية ملاحظات بقى نفهمهم ونركز فيهم

هنلاحظ ف الرادياتير انه بارد من تحت وسخن من فوق 

 وده بسبب ان المياه الباردة كثافتها اعلى من الميه السخنة فالبارد ينزل تحت والسخن يبقى فوق 

 ودى هتلاحظها لو حطيت حلة مياه ع النار ف بداية التسخين حط ايدك هتلاقيها سخنة من فوق وباردة من تحت بس اوعى تتلسع 


المياه جوا البلوك بتدخل من اسفل السليندر علشان متعملش اجهادات حرارية ع الشميز لو دخلت من فوق 

 كمان ف حدود لدرجات الحرارة يعنى غرف الاحتراق لازن تكون فرق درجات الحرارة بين جوا الشميز وبرا الشميز محدود بمعنى انه مينفعش لو عربيتك سخنت منك تكب مياه ع الموتور كله ده هيبوظ الدنيا 

 وكمان لما العربية تكون سخنة لازم نشغلها واحنا بنزدها مياه علشان متضربس جوان وش سلندر